Ástjarnarkirkja

Sunnudaginn 27. júní 2010 verður göngumessa safnaðarins. Lagt verður af stað kl. 11 frá Ástjarnarkirkju, Kirkjuvöllum 1 Hafnarfirði. Lesið upp úr Fjallræðunni á leiðinni. Þema ræðunnar  á fjallinu verður samkynhneigð, gagnkynhneigð og kristni. Skoðuð verða ýmis sjónarhorn og varpað ljósi ritskýringar á erfiðan texta í Rómverjabréfinu.

Fólk er hvatt til að klæðast eftir veðri. Þau sem vilja, koma með göngustafi en allir með góða skapið. Kakó og vatn fyrir gönguþyrsta á toppnum. Þar munum við samgleðjast samkynhneigðum og fjölskyldum þeirra.

Allir hjartanlega velkomnir. Helga Þórdís Guðmundsdóttir tónlistarstjóri og séra Bára Friðriksdóttir leiða stundina.

U2 messan í kvöld stóðst björtustu vonir. Minni salur Haukahússins var troðfullur. Rúmlega 300 manns hlýddu á fagran söng Ástjarnarkórsins, Svenna Þórs og Regínu Óskar. Hljómsveit Hjartar Howser spilaði  melódíur U2 undir og prestarnir lögðu inn Guðs orðið. Spilað var myndband með viðtali við Bono og af tónleikum sveitarinnar. Undir lokin leiddi sóknarnefndarfólk almenna kirkjubæn fyrir fátækum, kúguðum, arðrændum og fyrir ríkistjórnum allra landa. Beðið var fyrir réttlæti og jöfnuði. Söfnuðurinn fagnaði tónlistinni vel með kröftugu lófataki. Upp úr samskotabauki við útganginn komu rúmar 50.000 krónur og margir fóru heim með reikningsnúmer Hjálparstarfs kirkjunnar því allt féð rennur til innanlands og utanlands aðstoðar Hjálparstarfs kirkjunnar. Ágóði guðsþjónustunnar verður því ekki bara ánægja og blessun þeirra sem nutu, hún brauðfæðir íslenskar og afrískar fjölskyldur. Takk fyrir framlagið.

Helga Þórdís Guðmundsdóttir útsetti tónlistina en fimm textar Bono voru þýddir af sr. Gunnari Sigurjónssyni og var þetta frumflutningur á Íslandi. Helgu og sr. Gunnari eru færðar sérstakar þakkir fyrir framlag þeirra til þessa vel heppnaða kvölds.

Hér má sjá nokkrar myndir frá guðsþjónustunni.

Messan verður í veislusal Haukahússins fim. 13. maí kl. 20

Hér eru nokkrar myndir af kóræfingu

Sunnudaginn, 2.maí, var mikið um dýrðir í kirkjunni. Dagurinn byrjaði með fjölskylduguðsþjónustu, sem sunnudagaskólinn féll inn í. Sr.Bára stjórnaði stundinni og kirkjukórinn söng undir stjórn Helgu Þórdísar. Sunnudagskólabörnin og leiðtogar þeirra tóku virkan þátt og sungu mörg fjörug sunnudagaskólalög. Kirkjan var þéttskipuð frábærum gestum og þar ríkti mikil gleði og góð stemning.

Lesa áfram …

Við í kirkjunni finnum fyrir aukinni eftirvæntingu fyrir U2 messunni sem verður að kvöldi uppstigningardags 13. maí kl. 20 í Haukahúsinu. Gestasöngvarar verða Regína Ósk og Svenni Þór. Fólk er farið að spyrja presta, starfsfólk og kórfélaga um U2 messuna. Mikill áhugamaður um U2 sem farið hefur á tónleika með honum sagði undirritaðri að Bono héldi alltaf predikanir á sínum tónleikum og gætu þær orðið 20 mín. langar. Þá stíga aðrir hljómsveitarmeðlimir af sviði og leyfa honum að eiga orðið. Orð fagnaðarerindisins sem hann gjarnan boðar.

Hjá okkur mun sr. Kjartan boða fagnaðarerindið en ég lofa ykkur því að hugvekja hans verður ekki lengri en 5 mínútur.  Mætum og verum saman í stuði með Guði.

 Sunnudaginn, 2.maí, verður

fjölskylduguðsþjónusta kl. 11:00.

 Prestur sr. Bára Friðriksdóttir.

Kór Ástjarnarkirkju syngur

undir stjórn Helgu Þórdísar Guðmundsdóttur.

 Síðasti sunnudagaskóli vetrarins fellur inn í guðsþjónustuna.

   Á eftir verður lokahátið sunnudagaskólans. Þar sem haldið verður upp á að góður vetur er á enda og sumarið tekið við.

Hoppukastali, grillaðar pulsur, gleði og fjör.

Allir hjartanlega velkomnir.

Það verður U2 messa að kvöldi uppstigningardags, fimmtudaginn 13. maí kl. 20 í Haukahúsinu.

Ástjarnarsókn og Haukarnir vinna saman að þessu verkefni.

Kórinn æfir nú af krafti U2 lög Bono´s sem sr. Gunnar Sigurjónsson hefur íslenskað fyrir kirkjuna.

Margt verður sungið og síðar verður upplýst um einsöngvara.

Hér textinn In the Name of Love í íslenskri þýðingu sr. Gunnars 

og ber nafnið Ástin ein.

Hann kom í nafni kærleikans

Hann kom og hvarf á braut

Hann kom í krafti sannleikans
og kúgun valdsins braut.

Það er ástin ein

Hvað er meira en ástin ein.

Það er ástin ein

Hvað er meira en ástin ein.

Laus við freisting – til frelsunar
fór hann upp á kross.

Svívirtur og sjálfur var
svikinn þó með koss.

Það er ástin ein

Hvað er meira en ástin ein.

Það er ástin ein

Hvað er meira en ástin ein.

(hún ein varir)

Við hörmunganna hróp og níð
heldur á krossins stað
Með ræningjum og rustalýð
það reynist fullkomnað.

Það er ástin ein

Hvað er meira en ástin ein.

Það er ástin ein

Hvað er meira en ástin ein.

Sunnudaginn, 18.apríl, verður náttfatamorgunn í sunnudagaskólanum.

Þennan morgunn verðum við öll svo löt að við nennum ekki að klæða okkur og mætum bara á náttfötunum í sunnudagaskólann.

Þar verður margt til gamans gert að venju. Við heyrum söguna um það þegar Jesús steig upp til hinma. Brúðurnar Hvati og Mýsla koma í heimsókn og velta sögunni fyrir sér með okkur. Eirný spilar á gítarinn og við syngjum af hjartans lyst.

Hlökkum til að sjá ykkur öll, syfjuð og sæt á náttfötunum.

Fríða, Eirný, Stella Bryndís og Arndís Embla.